Ajax and Ulysses
From Book 13 of Ovid's Metamorphoses
Latin Text
Lines 361-398
The actual Latin text (with long marks)
Virgilius Solis (1514-1562) https://colonialart.org/artworks/1445A
tibi dextera bellō
ūtilis; ingenium est quod eget moderāmine nostrō;
tū vīrēs sine mente geris, mihi cūra futūrī;
tū pugnāre potes, pugnandī tempora mēcum
ēligit Atrīdes; tū tantum corpore prōdēs, 365
nōs animō; quantōque ratem quī temperat anteit
rēmigis officium, quantō dux mīlite māior,
tantum ego tē superō. nec nōn in corpore nostrō
pectora sunt potiōra manū: vigor omnis in illīs
'At vōs, ō procerēs, vigilī date praemia vestro, 370
prōque tot annōrum cūra, quibus ānxius ēgī,
hunc titulum meritīs pēnsandum reddite nostrīs:
iam labor in fīne est; obstantia fāta remōvī
altaque posse capī faciendō Pergama cēpī.
per spēs nunc sociās cāsūraque moenia Trōum 375
perque deōs ōrō, quōs hostī nūper adēmī,
per sī quid superest, quod sit sapienter agendum,
sī quid adhūc audāx ex praecipitīque petendum est,
sī Trōiae fātīs aliquid restāre putātis,
este meī memorēs! aut sī mihi nōn datis arma, 380
huic date!' et ostendit signum fātāle Minervae.
Mōta manus procerum est, et quid fācundia posset
rē patuit, fortisque virī tulit arma disertus.
Hectora quī sōlus, quī ferrum ignēsque Iovemque
sustinuit totiēns, ūnam nōn sustinet īram, 385
invictumque virum vīcit dolor: arripit ēnsem
et 'meus hic certē est! an et hunc sibi pōscit Ulixēs?
hoc' ait 'ūtendum est in mē mihi, quique cruōre
saepe Phrygum maduit, dominī nunc caede madēbit,
nē quisquam Aiacem possit superāre nisi Aiāx.' 390
dīxit et in pectus tum dēmum vulnera passum,
quā patuit ferrum, lētālem condidit ēnsem.
nec valuēre manūs infīxum ēdūcere tēlum:
expulit ipse cruor, rubefactaque sanguine tellūs
purpureum viridī genuit dē caespite flōrem, 395
quī prius Oebalio fuerat dē vulnere nātus;
littera commūnis mediīs puerōque vīrōque
īnscrīptā est foliīs, haec nōminis, illa querellae.